Green Grow the Rashes
by Robert Burns

Chorus
Green grow the rashes, O'
Green grow the rashes, O'
The sweetest hours that e'er I spent
Were spent among the lassies, O'

I

There's nought but care on ev'ry han',
In ev'ry hour that passes, O:
What signifies the life o' man,
An' twere na for the lasses, O.

II

The warly race may riches chase,
An' riches still may fly them, O;
An' tho' at last they catch them fast,
Their hearts can ne'er enjoy them, O.

III

But gie me a canny hour at e'en,
My arms about my Dearie, O;
An' warly cares, an' warly men,
May a' gae tapsalteerie, O!

IV

For you sae douse, ye sneer at this,
Ye're nought but senseless asses, O:
The wisest Man the warl' saw,
He dearly lov'd the lasses, O.

V

Auld Nature swears, the lovely Dears
Her noblest work she classes, O:
Her prentice han' she try'd on man,
An' then she made the lasses, O.

Previous Page Top of Page Next Page
Return to Table of Contents