Bonie Dundee
Tune: Adew Dundee
by Robert Burns

'O, whar gat ye that hauver-meal bannock?'
'O silly blind body, O, dinna ye see?
I gat it frae a young , brisk sodger laddie
Between Saint Johnston and bonie Dundee.
O, gin I saw the laddie that gae me't!
Aft has he doudl'd me up on his knee:
May Heaven protect my bonie Scots laddie,
And send him hame to his babie and me!

'My blessin's upon thy sweet, wee lippie!
My blessin's upon thy bonie e'e brie!
Thy smiles are sae like my blythe sodger laddie,
Thou's ay the dearer and dearer to me!
But I'll big a bow'r on yon bonie banks,
Whare Tay rins wimplin' by sae clear;
And I'll cleed thee in the tartan sae fine,
And mak thee a man like thy daddie dear.'

Previous Page Top of Page Next Page
Return to Table of Contents